ನೀವು ಉಪಯೋಗಿಸುವ ಮಿನ್ನಂಚೆ (ಮೈಲ್) ಒಳ ಪೆಟ್ಟಿಗೆಗೆ ದಿನವೂ ಬೇಡವಾದ ಮಿನ್ನಂಚೆಗಳು ಬಂದು ಬೀಳುತ್ತಿವೆಯೆ ? ಇದು ಸಾಧಾರಣವಾಗಿ ಎಲ್ಲರೂ ಅನುಭವಿಸುವ ಸಂಕಷ್ಟ. ತಿಳಿದೋ ತಿಳಿಯದೆಯೋ ಯಾವುದಾದರೂ ಸಾಮಾಜಿಕ ಜಾಲತಾಣದಲ್ಲಿ "ನೋಟಿಫಿಕೇಷನ್"ಗಳನ್ನು ಸಕ್ರಿಯಗೊಳಿಸಿರುತ್ತೇವೆ. ಫೇಸ್ಬುಕ್ನಲ್ಲಂತೂ ಇದು ಸರ್ವೇ ಸಾಮಾನ್ಯ. ಅಲ್ಲಿ ಯಾವುದಾದರೂ ಒಂದು ಗುಂಪಿಗೆ ನೀವು ಸೇರಿಕೊಂಡರೂ ಮುಗೀತು, ಮಿನ್ನಂಚೆಗಳ ದಂಡೇ ಬಂದು ನಿಮ್ಮನ್ನು ಗುಂಪಲ್ಲಿ ಗೋವಿಂದ ಮಾಡಿ ಬಿಡಬಹುದು. ಅಲ್ಲಿ ಪ್ರತಿಯೊಂದು ಹೊಸ ಗೋಡೆ ಬರಹ ಬಂದಾಗ ಅಥವಾ ಪ್ರತಿಕ್ರಿಯೆ ಬಂದಾಗ ಅವು ನಮ್ಮ ಮಿನ್ನಂಚೆಗೆ ಬಂದು ಬೀಳತೊಡಗುತ್ತವೆ. ಹೀಗಾದಾಗ ನಿಜವಾಗಿಯೂ ನಮಗೆ ಬೇಕಾದ ಅತ್ಯಗತ್ಯ ಮಿನ್ನಂಚೆಯನ್ನೂ ಸಹ ಹುಡುಕಬೇಕಾದ ಪರಿಸ್ಥಿತಿ ನಿರ್ಮಾಣವಾಗುತ್ತದೆ.
ಇದಕ್ಕೆ ಪರಿಹಾರವೇನು ?
ಇದಕ್ಕೆ ಪರಿಹಾರ ಇಲ್ಲದಿಲ್ಲ. ಮೊದಲನೇ ಪರಿಹಾರ ಆಯಾ ಸಾಮಾಜಿಕ ತಾಣಗಳಲ್ಲೇ ಕಂಡೂ ಕಾಣದಂತೆ ಸೂಚನಾ ಮಿನ್ನಂಚೆಗಳನ್ನು ತಡೆಯುವ ಅವಕಾಶವನ್ನು ನೀಡಿರುತ್ತಾರೆ. ಉದಾ : ಫೇಸ್ಬುಕ್ಕಿನ ಗುಂಪುಗಳ ಪುಟದಲ್ಲಿ ಬಲಭಾಗದ ಮೇಲ್ಗಡೆ "Notification" ಎಂಬ ಒಂದು ಗುರುತು ಇದೆ. ಅದರಲ್ಲಿ Notification ಗಳನ್ನು OFF ಮಾಡಲು ಸಹ ಅವಕಾಶವಿದೆ. ಹಾಗೆ ಮಾಡಿದರೆ ಅಲ್ಲಿಂದ ಬರುವ ಸಾವಿರಾರು ಮಿನ್ನಂಚೆಗಳು ಬರುವುದಿಲ್ಲ. ಆದರೂ ಫೇಸ್ಬುಕ್ನ ಇತರೆ ವಿಷಯಗಳು ನಮ್ಮ ಮಿನ್ನಂಚೆಗೆ ಬಂದೇ ಬರುತ್ತವೆ. ಅವು ನಿಮಗೆ ಅಗತ್ಯವಲ್ಲ ಅನ್ನಿಸಿದರೆ ಎರಡನೇ ದಾರಿಯನ್ನು ಹಿಡಿಯಬಹುದು. (ಈ ಚಿತ್ರ ನೋಡಿ..)
ಎರಡನೇ ಮಾರ್ಗವೇನೆಂದರೆ, ನಮ್ಮ ಮಿನ್ನಂಚೆಯ ಒಳ ಪೆಟ್ಟಿಗೆಗೆ ಬಂದ ಮಿನ್ನಂಚೆಗಳಲ್ಲಿ ಇಂತಹ ಬೇಡವಾದವುಗಳನ್ನು ಆಯ್ಕೆ ಮಾಡಿ ಮೇಲ್ಗಡೆ ಇರುವ ಸ್ಪಾಮ್ ಗುರುತನ್ನು ಒತ್ತುವುದು. (ಚಿತ್ರ ನೋಡಿ), ಹೀಗೆ ಮಾಡುವುದರಿಂದ ಸಂಬಂಧ ಪಟ್ಟ ಜಾಲತಾಣದ ಎಲ್ಲ ಮಿನ್ನಂಚೆಗಳೂ ನೇರವಾಗಿ ಸ್ಪಾಮ್ ಬುಟ್ಟಿಗೆ ಹೋಗುತ್ತವೆ. ಇದರಿಂದ ನಮ್ಮ ಮಿನ್ನಂಚೆಯ ಒಳಾಂಕಣ ಸ್ವಚ್ಚವಾಗಿ ಇರುತ್ತದೆ.
ಅಗತ್ಯ ಮಿನ್ನಂಚೆ ಸ್ಪಾಮ್ ಆಗುತ್ತಿದೆಯೆ ?
ಕೆಲವೊಮ್ಮೆ ಮತ್ತೊಂದು ಬಗೆಯ ತೊಂದರೆಯನ್ನೂ ಎದುರಿಸಬೇಕಾಗಬಹುದು. ಅದೇನೆಂದರೆ ನಮಗೆ ಅಗತ್ಯವಿರುವ ಮಿನ್ನಂಚೆ ಸಹ ಸ್ಪಾಮ್ ಬುಟ್ಟಿಗೆ ಹೋಗಿ ಬಿಡುವುದು. ಆಗ ಕೆಲವೊಮ್ಮೆ ಅದು ನಮ್ಮ ಗಮನಕ್ಕೆ ಬರದೇ ತೊಂದರೆಯಾಗಲೂ ಬಹುದು. ಇದನ್ನೂ ಸಹ ನಿವಾರಿಸಲು ಉಪಾಯ ಉಂಟು. ಅದು ಏನೆಂದರೆ ನಮಗೆ ಅಗತ್ಯವಾದ ಅಂತಹ ಮಿನ್ನಂಚೆ ವಿಳಾಸಗಳನ್ನು ನಮ್ಮ ಮಿನ್ನಂಚೆ ವಿಳಾಸದ ಪಟ್ಟಿಯಲ್ಲಿ ದಾಖಲಿಸಿ ಬಿಡುವುದು. ಆಗ ಜಿಮೈಲ್ ಅದರಿಂದ ಬರುವ ಮಿನ್ನಂಚೆಗಳನ್ನು ಸ್ಪಾಮ್ ಎಂದು ವಿಂಗಡಿಸದೇ ಒಳಾಂಕಣಕ್ಕೆ ಬಿಡುತ್ತದೆ.
ಕಾಮೆಂಟ್ಗಳು